Keterubah

Sebedau kami ngemantai ka cherita kami ditu, dulu kami meri besai terima kasih ngagai bala maioh ka deka macha utai ka dikarang kami tu.
Aku deka ngemadah ka sapa bala kami ka ngarang cherita tu.
Kami tu datai ari Sarawak, iya nya, CK, Henry, Temara enggau Jeffrey. Bala kami tu sama begulai kereja ba siti kompeni.
Kami ka ngena blog tu alai kami mantai ka penemu kami sereta runding dalam topik dicherita ka kami. Ngicha ka blog tu ulih dikena kami ngangkat ka bangsa kitai dayak, enggai ka jauh tinggal ari pemansang bansa bukai.

Taja pan kami datai ari latar belakang ti enda sama, tang kami ngasai ka nya siti kebuah ka manah dikena kami ngemantai ka penemu, ari pikir kami empu. Antara topik deka dipadah ka kami, iya nya, beza menoa kitai enggau menoa bukai, baka Singapura; munyi ka salah leka jako, menoa Singapura tu endang sigi mansang ari menoa kitai. Taja pia, menoa kitai maju tang enda baka Singapura tu. Ukai kami ka ngemesai ka menoa tu, tang utai nya sigi nyata dipeda mata kami empu.

Ba Singapura tu, amat maioh utai ke manah lalu pemansang pan mujur dikemansang ka bala sida perintah ka megai menoa Singapura tu. Utai ka manah dipeda kami ditu, ba ditu bisi sistem dalam ngereja segala pengawa. Chara kereja pan bisi teknik sereta ngena teknoloji ke maia ari.

Ba Singapura tu mega, maioh alai ngelantang ka ati, baka Sentosa, East Coast Beach Park, Zoo enggau Taman Burung. Ba menoa kitai din, bisi amai bisi, tang enda baka ba Singapura tu, laban bala perintah ditu kuat ngelalau bala sida iya nuju endor nya.

Tambah mega pemeresi menoa tu chukup dijaga enggau manah. Ngambi ka contoh, papung insap enggau bala sida sampah enda tau dibuai sengapa. Enti dibuai sengapa, endang sigi dihukum enda kurang ari S$200. Kedai kupi ba Singapura tu pan enda tau endor kitai nginsap sebarang. Tau ga nguji, tang sedia aja meh duit S$500.